Home » Blah Blah » Nadi

Nadi

O ri nadi, kaha tu chali
Do pal toh rukja, oo meri sakhi
Chal baith kinaarey pe kuch baatien kartien hai
Samajhtey hai jasbaaton ko tere, alfaaz dene ki koshish si kartey hai
.
.
Na mere dost, jana hai mujhey, theherna mera naam nahi
Nanhey see gaon me raah taktey hongey kuch anjaaney log meri
Patharo ko cheerke, kinaarey mod beh jaungi mai
Baadalo se juda ho ke khud se hi kahi mil jaungi mai
.
.
Jab pahuchungi waha tab kheti hogi kisi gareeb ki
Fasal kaat paisa kama bachiyaan padhengi uski tabhi
Bhavishya hai kisi ka haatho me mere, umeed ki dori bandhi hai
Naadaan na ban oo swaarthi dost, mera safar meri manzil baaki abhi hai
.
.
Mere honey se suhaag zinda hai kisi ka
Sansaar ujwal hai nanhey parindo ka
Jo nahi pahuchi toh kahi laash na uth jaye kisi kisaan ki
Naa sameet paungi kaanch chudiyoon se un vidhwaon ki
.
.
Kya mooh dikhaungi mai kal un bacho ko
Fasal na aaney se kandhey diye jinhoney janaaso ko
Abhi toh umrr hai unke aankho me khushiya sapney batorney ki
Rukney se mere kahi ujad na jaye duniya unki
.
.
Jwala see bahengey aansu un parindo ke gaalon pe
Cheenkhey bhi hongi oonchi mere behney ki aawaazo se
Paani see nafrat na kar baithey kahi woh nanhi pari
Shamshaano see naatey jodney ki yeh toh koi umrr nahi
.
.
Swaarthi toh tu insaan hai jo sirf mujhey chahtey hai
Istamaal kar mera mujhey hi tod jaatey hai
Jinkey liye paida huyi unhoney hi mujhey baanta hai
Khoon hua hai mera par rang kuch aur batlata hai
.
.
Koshisho se jee hu mai sabko sawaarney ki hi meri chaah rahi
Marr bhi gaya tu toh teri raakh hi meri sangini bani
Jeewan deti hu mai maut ko bhi god me khilati hu
Jo jhaankey tu mere aanchal me sab sacha hi batlaati hu
.
.
Kya samjhau tujhey apne jasbaat kya hi tu samajh payega
Shabd khraab kar dengey unhey tera bhi dil toot jayega
Galat na samajh mujhey tu bhi mera dost hai tere liye hi behti hu
Muskaan ayegi mere honey see tere mukh par bas is hi umeed me mai jeeti hu
.
.
Jaa rahi hu Mai, fir kisi mod pe milungi
Fir thehrney ko bolega tab bhi yehi kahungi
Jaaney de mujhey rukna mera naam nahi
Hu tere liye par tujhse hi badnaam sahi
Tu ujaad bhaley mujhey, sakoon tab hai jab ho ronak ghar pe tere
Ek maa ka kaleja hai ye tu na samjhega dost mere
.
.
.
.
« »

Post comment